Dezi-me alhá se nun bos gustarie muntar-bos nua bicicleta destas.

Cunfesso-bos, amigos lheitores, stou anraibado cul mundo! Yá nun hai balores, carai?

Anton, nun ye que un die destes, oubi dezir que la Playboy pertuesa iba  a bolber? Curjidoso, alhá fui a tentar saber mais qualquiera cousa. Quien serie la cápia? Fiç ua pesquiza na anterneta i alhá ancuntrei ua ambora que dezie "A atriz Rita Pereira vai posar, pela primeira vez, mais ou menos nua, para uma revista masculina".

Carai, que ye esto de pozar mais ou menos znuda?! Nunca oubi falar de tal cousa. You inda me lhembro de ls tiempos de la mie mocidade, quando ampecei a cumprar la Playboy. Naqueilha altura cumprar ua rebista de ties znudas an Miranda nun yera nada fácele. Corrie-se l risco de star a pegar na rebista ó a pagá-la i aparecer alguien coincido i poucos minutos apuis yá todo mundo saberie. Feliçmente nunca me acunteciu i tengo que le agradecer a tiu Juquin por esso.  El yera tan bun home que, por mais cinquenta milreis, ambrulhaba la rebista cun papel manteigueiro i screbie alhá "Eisercícios de Matemática". A mi, bundaba-me preguntar por ua rebista subre Matemática i, sin que naide quejisse abrir la rebista, lhebaba lhougo la Playboy brasileira ó la spanhola para çfolhar al serano.

Ah doces recordaçones que nada ténen que ber cul persente! Anton que cousa ye esta de ua Playboy que trai ua tie mais ó menos znuda? Que sociadade ye esta? Cun que balores bamos a eiducar ls nuossos filhos?! Quando la rebista saliu, corri a ber cumo serie i, anfeliçmente, ls mius medos cuncretizórun-se: mais ou menos znuda quier dezir cumpletamente bestida. You digo-bos, lheitores: yá bi rapazas cun muito menos roupa ne l Mensageiro de Bragáncia!

I se nun acraditais an mi, deixo-bos eiqui las eimages de la "renobada" Playboy pertuesa.

Se quejirdes mais i an punto grande, podeis ir a este site: http://famosasdespidas.com/rita-pereira-na-playboy.html

You, pessonalmente nun bos acunseilho, a nun ser que quérgades quedar cun pensamientos tan depressibos cumo ls mius. Feliçmiente lhembrei-me de ua rebista que la mie habie cumprado ua beç, parece-me que fui la Nuoba Giente. Ua pesquiza rápida i alhá ancuntrei la mesma tie que ben hoije na Playboy, mas uns anhos antes:

Essa parte de las "fotos exclusivas" faç sentido, nun faç?

I pronto, a partir de hoije, bou-le a bedar als mius rapazes que cómpren las rebistas ditas masculinas. Se quieren ties znudas, ye spreitáren las rebistas de la mai!

Puis ye, caros leitores. La barriga yá me pesa. Diç l doutor que ye cumo andar cun un garrafon de cinco litros agarrado alantre. L peso stá a oumentar, la cintura scapou-se, la çanceblidade medrou i l choro ben-me depressa al peito i las lhágrimas mais me cuorren pula cara abaixo cumo mundiada an atronada d´Agosto. Anque yá oubira tebido ua grande zeiluzon, stou feliç i cada beç que la nina a quien chamo Einés se mexe andrento de mi, ye fuorça que me medra i me dá fuorça para cuntinar.

Cumequiera si se bos lembra que m´ajuntei cun Miguel, un spanholo de Çamora, un home que fui coincendo an rebolcos, grande paixon que me fizo acarditar que nun percisarie de mais naide para me fazer chegar a las streilhas na cama i al cielo na bida. Apuis fumos coincendo noutras cousas i decedimos que habiemos de tener ninos, ua bida cun respeito antre ambos, sien facadas fuora de marras, sien mintiras.

Ua beç cuntórun-me ua cuonta que até me deixou de boca abierta. Era ua tie qu´habie ido pal spital a tener un nino i naide era capaç de saber de l sou tiu. Yá l nino boziaba cumo que a chamar por sou pai, anquanto el a rebolcos cun outra mulhier. La sue tie nunca soubo, cumo diç l´outro, l cornudo ye l último a saber...

Quedei amulada de todo quando me cuntórun esta stória, you que nunca quije zbiar homes casados para nun strampalhar la bida de naide. Si, porque nun ye nada custoso birar un home alrobés quando ua amiga (an pertués, amante) fai de todo para poner l mintiroso tonto, yá que nun ten mais ningua merda de porblema cun el que le strague la cuncentraçon para chegar als ourgasmos i lo lhebar a el als cunfins de ls anfiernos cun la calor. Cuido que ls tius son un tunticos i que a las bezes só pénsan cun la moca, an beç de la cabeça.

Anton, naqueilha stória, çculpaba-se aquel cabron de merda, qu´era l que el merecie ser, que tenie que çpejar las alforjas, porque, ne l ampeço, la sue tie andaba cun gómitos i que l oumentában quando el cun la barba se l chegaba i eilha le sentie l cheiro. Apuis porque la barriga yá iba medrando i era custoso, apuis ne l fin tenie miedo de ferir l nino. Cabron de merda, el debie era de tener berga bien pequeinha para le ser custoso. Çculpas de quien quier tener la tie para parecer, i siempre outra para foder. Anton el nun saberie qu´hai siempre outras posiçones an que la barriga nun storba!? Algua beç la berga poderá topar ne l nino!?

Esta fui la stória que nunca se me çqueciu i que you achei que nunca m´habie d´açuceder. Nunca se puode cuçpir parriba i ye bien berdade! 

Aquel spanholo lampantin fizo-me la mesma, solo que you, mulhier bien batida nestas cousas de sexo, apanhei-lo mais depressa que la outra i, eirei you sola a parir la nina porque le puse yá las malas a la puorta i le dixe, "la ruga ye para perros cumo tu".

Outra beç lhibre d´home único i cun ua filha deiqui a trés meses ne l cuolho.

Ua andorina nun faç la Prima Bera.

Bera Zimmerman

 Deixa que you te coço la mordesquina ne ls bulardonicos!...

Hoije, a la purmanhana, anquanto me zanjoaba na pastelarie, you i la mie bezina:

EILHA - Sabes, Çáncia, l gobierno ten rezon an le dezir a las pessonas para eimigrar.

YOU - ...

EILHA - L miu home, cuitado, andaba porqui zampregado...  als biscates... nun ganhaba un cuorno!

YOU - I anton?!

EILHA - Apuso-se i eimigrou. Fui-se a saber de trabalho ne l strangeiro. An menos de nada yá ganhou dous!...

Cumo todos sabemos, este blogue faç serbiço público i ten trabalhado pula eilebaçon cultural de ls sous lheitores. Por esso you hoije trouxe-bos un cachico de un filme malo, mas que ten deç minutos que bálen la pena.

I preguntai bós: para que bou you a ber esse bídeo se Jesé yá dixe que l filme ye malo? I you respuondo: porque ten ties buonas i znudas, l' óunica buona rezon que puode lhebar alguien de buon gusto a ber filmes malos.

Se calhar, stou a eisagerar. Puode haber outras rezones para ber un filme malo. Debemos fazer esse sacrificio, por eisemplo, quando bamos acompanhar ua rapaza cun gusto malo i cuorpo buono. Neste causo, debemos scolher eissencialmente dous tipos de filme: filmes de amor lamechas (quanto mais comobida eilha stubir, mais mos podemos agarrar a eilha) i filmes de terror (se eilha se assustar a sério nun tenerá outro remédio a nun ser agarrar-se a nós). Mas yá me stou a çpersar...

Antes de berdes l bídeo deixai-me dezir-bos que el puode ferir la buossa sensibilidade. Nun por causa de las rapazas ou de l sexo, ye claro, mas por causa de ls diálogos. Son tan malos, que ua pessona pouco resistente até pode nun aguantar l bídeo até l fin, l que ye ua pena....

L que teneis a fazer ye simples: zligai l sonido i cuncentrai-bos solo nas eimages. Pormeto que nun bos arrependereis.

Para ber mas nun oubir... por reibibi

You siempre me tengo cuntinedido para nun ousar aqueilhas palabras que a las bezes me parece que son  mais para homes. Nestes dies arrebento se nun dezir foda-se. E porquei? Por bias d´acusa cristos que, nun tenendo tematos para dezir las cousas cara a cara no die cierto, bien mirando ls uolhos, bénen apuis cun tiradas de"queixinhas", cumo se diç na mie lhéngua armana, cumo quien quier botar l´auga fuora de l capote.

Ye que ua mulhier tamien nun ye de fierro, foda-se!!!! I isto porquei? Porque siempre me dou ganas de me aguemitar cun acusa cristos.

Hai cousas que tenemos arrimadas ne ls terceiros, cumo ramalhada de leinha rebielha, i apuis estas  fázen salir aqueilhas i las eimages pássan-me na cabeça cumo sartas de rosairo an mano de amiga de cura.

Ua beç la mie bezina de lhado de la carteira na scuola acusou-me a la porsora que you habie botado pal chano papelicos rasgados. Justícia séia feita al sentido de justícia de la porsora. Sali de la scuola cun las dues manos ansarapulhadas. Fura berdade ó nó, era a mi que debie de dezir. Mas nó! Bota a acusar para quedar bien ne l retrato cun la porsora...

A la salida, a modo de star fuora de puortas de la scuola you dei-le ls papelicos cun ua túndia que nunca mais se habie de squecer.

Foda-se!!! Ye l que a las bezes habien de lhebar esses "queixinhas", acusa cristos, quando, nun dezindo las cousas no die cierto bénen apuis cun çufismas para podéren quedar bien ne l retrato.

Para mi isso ye falta de tematos i ye de giente manhosa!!!!

Bá, nun bos bou a ambair cun mais cousas destas que isto ye mais de Poucabergonha i por bias disto nun amento an nomes.

Tube que zabafar i nun hai cumo fazê-lo cun uas buonas caralhadas...

Filha de la puta de la bida, i de l trabalho, i de las farras, i de las gaijas i al caralho, que nun me déixan bagar para star l tiempo todo que you querie eiqui ne l sano cumbíbio cun bós, stimados leitores deste requintado i anstrutibo spácio de cultura.

Deixo ls outros a temar cuonta de l soto i ye l que se bei: de un lhado, un pixa mol, cun filmes adonde la rapaza nien se chega a znudar; de l outro, ua tuntica cun cumbersas de ourgasmos femeninos, abrenúncio, vade retro, ua merda que nun le antressa nien al Coneilho de la Páscoa, foda-se, algun de bós algua beç le procurou a las çapateiras ó a las çantolas que acabábades de papar se par'eilhas tamien habie sido buono, ora l caralho de la lhambráncia.

Buono, nun antressa, yá quantá que nun bengo eiqui a atualizar las fondas i anstrutibas reflexones cun que stais d'afeitos a anriquecer las buossas bibéncias i apuis l assuntos atrásan-se-me... you, ne l miu trabalho, bien bou temando notas mantales anquanto stou a ler las amboras de l jornal ne l café, que nun me hei de squecer de amantar nisto i naquilho, mas apuis antra ua flausina de saia cúrtia i senta-se na mesa delantre de mi a cruzar i a çcruzar las piernas, refodiu-se la cungeminaçon, ban-se-me las anotaçones todas cul caralho, quier dezir, bai-se-me todo pal caralho i barre-se-me todo de la cabeça.

De maneira que, cumo stamos atrasados, hoije nun hai personalidade de la semana (l que nun quier dezir que nun haba habido balerosos candidatos, inda hoije houbo çcuçon n'Assamblé, ls candidatos éran cumo tordos, aquel lhambon que mos fodiu ls 4 melhones i tal d'ouros para dar als amigos i pagar ua merda que yá staba paga, esse bien merecie eiqui uas bardoadas balientes, mas, buono...) nun hai prémio de la semana, mas deixamos eiqui uas mançones hounrosas para las personalidades que ultimamiente se ténen çtinguido puls altos serbiços pretados al paiç i a la houmanidade.

L purmeiro lhugar bai dreitinho para la Cámara Munecipal de Lisboua, na figura de l sou Eicelantíssemo Persidente, que an buona hora se lhambrou se sastifazer ua fonda aspiraçon que bibe ne l más íntemo de cada berdadeiro pertués, assi puoda ser copiado puls outros pexangas todos de l outros persidentes, cul de Miranda a la cabeça. Pus claro, ua cousa que staba eilhi delantre de ls uolhos, más relhuziente que l sol, i naide la bie: ua casa de putas munecipal. Qual abastecimiento d'auga, qual transportes, qual scuolas, qual habitaçon social, qual rede rodobiária nien qual caralho... purmeiro hai que dar repuosta a las necidades básicas de la populaçon, i todos sabemos que, you falo por mi, purmeiro ye foder! Putas para tod'mundo, puoden benir eileiçones que esse yá nun hai quien l tire d'alhá, ouxalá la moda pegue i se sparja pulas juntas de freguesie de l paiç, siempre será maneira de le poder dar algua serbantie a tanta scuola cerrada que tenemos ne ls lhugares de l Praino, alguas yá las streformórun an tabernas - cháman-le associaçones culturales - agora las que fáltan ye poné-le ua lhuç burmeilha a la puorta i bereis cumo déixan l pobo cuntento i debrebe salimos de la crise.

Para la de Lisboua, siempre ten l galardon de ser la purmeira, you aperpongo que haba çcuntos para residentes, Carton Jobe i carton de Eidoso i inda bou más loinge: deputados i eilemientos de l goberno a foder de grácia i cun garaffa de champanha oufrecida pula casa! Quien sabe se apuis, culs colhones bazius, yá nun le dá tanto la gana de foder l paiç i a quien trabalha!!

La outra mançon Hounrosa, tamien bien merecida, bai para l nuobo Cardeal pertués, munsenhor nun sei quei, nien l nome amporta, l que si amporta ye la coraige que yá amostrou i l peito cun que pormete atacar ls males anfermiços que atafánhan l mundo d'hoije.

Diç Munsenhor - i isso bundou para ganhar la mie admiraçon para to la bida - diç anton ua cousa que muito pensa mas nun ten colhones para dezir, ua berdade más clarica que l'auga acabada se sacar de l poço, an poucas palabras, ua filosofie de bide que mos podie fazer eimandar l malo camino por adonde mos metemos: l campo de las ties ye an casa a criar ls filhos!

Ah caralho, quantos cunheceis bós cun esta fruntalidade i esta coraige?!

Pus, nun quérgades saber... cumo todos ls génios i ls sábios adelantrados de más para l sou seclo, por dezir ua berdade inda más bielha que  l tiempo, este home fui curceficado an público. Fui un Dius te lhibre, aqu'del rei, que l home isto, que l home aquilho, queixas de associaçones de nun sei quei, un alberoto. Ora, caralho, anton por dezir la berdade tamien yá se merece castigo?! I ye que apuis ls que cratícan ténen bien pouca bison, matában-se dous coneilhos c'ua bardoada: a la ua, baixaba la taxa de zamprego, las ties yá nun cuntában i inda deixában ls campos deilhas ne l trabalho lhibres para ls homes fazéren las cousas cumo debe ser; a la outra, naide puode negar la bantaige de tener la mulhier an casa a tratar de la família: andaba todo mundo más bien quemido, ls cacharros, l chano i ls farrapos lhabadas, ls garotos na scuola sien moncas i bien peinados, era outra cousa, nien se puode acumparar, solo bantaiges. I ye que apuis, you inda podie zlhargar l miu trabalho ne l scritório - filho de la puta que inda ten bien repunsabelidade i bien mataçones -, i meté-me, cumo tal, de çtribuidor de botijas de gaç al demecílio, que habie de ser un regalo a ber de "atarraxar" anilhas i "dar un jeito a la bilha" de las duonhas de casa mies clientes.

 Fui mal antandido l home i ye ua pena que nun se siga l cunseilho del. Isto de ls porcessos de quemunicaçon ye ua fodice: se un diç ua berdade, mas que nun dá jeito que se saba, lhieba lhougo ua carga de demagógico i passa por populista; se un diç uas mintiras i ye acaçado, ten que se poner ne l caralho, cumo tal, para Paris i ambantar ua çculpa qualquiera, you sei alhá, l que benir a la cabeça na altura, por eisemplo, que se bai a sacar un curso de qualquiera merda, se un diç la berdade, la más pura de las berdades, todo mundo fai oureilhas moucas, ua fodice.

Son cumplicados la malos antandidos de la quemunicaçon. Mesmo you, un recunhecido mestre nessa chubida arte, quereis ber l que me passou un die destes?

Para ber de le caçar la çanfona a ua chabasca que trabalha cumigo alhá ne l scritório, ua "puosta" inda más antolhadiça que las de l die de feira, un die destes arrimei-me a eilha nua aproximaçon eilegante, "discreta i subtil" cumo ye siempre miu "timbre" i segredei-le al oubido: "Ai, filha, you, a ti, metie-te ua laranja na boca i chupaba-te l grelo anté salir laranjada... habie de ser foder i spechocar anté ancuntrar petrólio!..." I la gaija, mula, botou-me uns oulhicos anchoquecidos i diç-me: "Aparece an mie casa lhogo a la nuite que l miu bai culs garotos a la bola i nun stá alhá naide". "Ban todos, nun queda naide an casa?", inda le procurei you, a parecé-me la smola muita. "Bai todo mundo a la bola, aparece i cun ganas que nun queda naide an casa".

Caralho, sien naide an casa era d'aporbeitar. Inda me custou quedar you sien ber l miu Benfica, mas a la nuite nun le perdonei: demudei ls truces i las meias de l més, botei la brelhantina i un perfumico i alhá bou you, fungando, a la outra punta de la cidade.

Baiu la pena, para quedar bien ciente de ls malos antandidos de la quemunicaçon: ye que rialmiente, la gaija era puta refinada i nun me habie dezido niua mintira: quando cheguei, chamei i era bien berdade que nun staba naide an casa: nien l home, nien ls garotos...nien eilha.

L retrato? Ora, caralho, l retrato. Pus l retrato ye l retrato de ua rapaza buona para la poda, que me pediu para mantener l anonimato, anton quei caralho queriedes que punira a anfeitar? Ua natureza muorta?...

Más a más, hoije nun diç que ye l die de la mulhier, anton que melhor houmenaige queriedes que poner ua mulhier baliente a ancabeçar l scrito?

Anda nó, ponie un ramo de rosas ó un caco de malbas ó un prato pintado ó l caralho, cun dedicatória de ua dessas frazes adocicadas de fazer l mundo melhor, que a mi anté parece que me dan caganeira. Eiqui nun hai paneleirices dessas; eiqui l'houmenaige ye "eiçar bandeiras" i nun deixar "arriar l mastro" para saludar a to las mulhieres. Las que quejíren dezir la berdade, cunfessarán que nun hai "jantileza" más buona que essa!

Se esto ye assí cun un hamburguer, eimagino l que nun serie cun ua puosta a mirandesa!

,...cumo nun hán-de gustar ls pertueses!?

Puode ser que un que you porqui tengo bido nun l pareça mui bien l que bou a dezir cun esta prelhiendra que bou a botar. Parece-me a mi que esse tiu se stá a cagar para isto, puis l que el gusta ye ousar las mulhieres an sou porbeito. Para el i para todos ls machistas que nun s´amportan cun l prazer de las mulhires ban estes recados.

A las bezes oubo l porgrama de l´Antena Trés, La Hora de l Sexo, adonde un tiu cumbersa cun ua rapaza que cun el fai l porgrama. Fala-se de todo cun toda la naturalidade, sien bergonhas ó percunceitos. Tamien you gusto de falar assi subre estas cousas que son tan naturales cumo quemer ó resfolgar. Bá, mas cun estas i cun outras yá staba a salir de la torna que eiqui hoije me truixo- l ourgasmo femenino.

Ua mulhier ten que ser topada. Se l tiu nun sabe fazer bien esses remissacos todos para qu´eilha quede cun la frauga caliente, tenerá que ser eilha a dezí-le an que puntos i cun que macieç l debe fazer. Nun hai mulhieres fries mas si homes desajeitados. Ora, l punto percipal para alhá de ls carinos ye l clitóris, sendo, sigundo el, nua grandura de treze centímetros, de riba de l capulho anté l forro de l canal baginal. Será que todo mundo sabie isto? Todo mundo sabie que todo aquel anchaço cun que queda la mulhier an sous múscalos de l´antemidade, que tan bien acunchégan las bergas, séia eilhas de que grandura fúren, todo isso, dezie, ye clitóris!? Mirai que you tamien nun l sabie i bendo-bos-la cunsante la merquei.

Muita beç, ó porque la mulhier nun stá caldiada, ó porque nun ye capaç de se lhibartar de ls porblemas de l die, nun ye capaç de chegar a l´ourgasmo i acaba assi cumo quien ceba i nun mata. 

Apuis, puode acuntecer que eilha faga de cuonta que si, i finge cun sues artimanhas, l ourgasmo.

Percuraba la rapaza de l porgrama: Mas ye bien que la mulhier faga de cuonta?

Claro que nó, dezie Quintino. Fazer de cuonta que si só agraba la queston, mas pior que isso, ye l home nun se dar de cuonta.

Quando assi Quintino dixo, ( you trato-lo assi porque you i el somos tu acá, tu alhá. El mandou-me falar destas cousas an Mirandés). Diç el: ye amportante que se fale de sexo an todas las lhénguas.

Cumo iba dezindo,  lhembrou-se-me de l que bos falei ne l ampeço, a perpósito de Poucabergonha. Se todo mundo yá sabie de quien you staba a falar, porquei nun amantar no sou nome? El nun se debe dar de cuonta de ls ceçares que se faien andrento de la mulhier apuis qu´eilha passou para alhá de l punto de rebuçado i, l mais cierto ye acarditar siempre ne ls gemidos.Talbeç mais machista que nécio...

Até qualquiera die!

Apuis daqueilhas nuobas que bos dei, quando bos dezie, pula mano de Çáncia, que serie la redadeira beç que eiqui bos falarie, muita cousa mudou.

Na mie bida, na maneira cumo l´ancaro, la maneira cumo la bibo.

You fui ua zarregrada an atos i deseios, an práticas i bibéncias.

Stube a las puortas de la muorte, fraquita, sien fuorças, cun l cuorpo cargadico de xagas. Todo se m´agarraba porque l miu sistema eimonulógico staba sien fuorças para lhuitar contra qualquiera malina. Ls sintomas éran de Sida. Fiç las análeses i benie cunfirmada. Soubo-se apuis que habie habido anganho. Cun ls antibirales que staba a meter ne l cuorpo solo me fazien quedar inda mais mala. Apuis houbo un doutor que quijo cunfirmar l´análese i biu que nun era nada disso mas si un problema grabe de sangre que agora feliçmente stá curado.

Todo isto me dou mais fuorça para bibir i saber bibir. Nun quiero cuntinar a lhebar la bida que lhebei, de orgies, de trocar de home sien l coincer i tener sexo sien camisica, sien saber se podie tener.

Stou cun Miguel i nun stéiades a babá-bos yá, cun las partes a queréren arrebentar las calças, sien campo i cun ganas de salir, porque nun bou a cuntar nada de l que fazemos na nuossa antemidade. Bou a falar de todo abiertamiente mas nunca cuntando l que pratico, mas unicamente cun base an spriença cumo se fura ua secçóloga.

Algua cousa hei-de screbir mas las mies cuontas nun ténen cumparança cun las d´antiempos. Stou prenhada d´un nino que nacerá alhá para Julio, amo a Miguel, nun quiero mais naide i, quando se ama i se ten ua bida cun eideias de feturo nun se cunta l que se passa, anque se cuntine a tener ua bida chena de abinturas eiróticas.

Stou biba i,... stou demudada.

Tan bárbaro fui l cagaço cumo fui la mie mudança...

Bien haias Çáncia, por todo l que por mi faziste.

You nun puodo amparceirar cula mie cumpanheira de blogue, la senhora dona Çáncia de la Ancarnaçon, que Dius le guarde por muito i bun anho las manos que tan buonos scritos mos oufrece, que you, cumo iba dezindo, nun tengo cabeça ( a bien dezir, nien cabeça, nien filha de la puta de pacéncia niua para essas merdices...) para reflexones i pansamientos tan perfondos i cismáticos cumo aqueilhes cun que eilha ten la delicadeza de chubir l nible deste spácio de cultura i de eilustraçon, i inda bien que assi ye... (yá bou mei perdido ne l caralho de l filo de la miada, pareço un político a falar, caralho m'afoda, que a meio de la frase se me squece l que iba a dezir, ye l que dá tener las eideias bien firmes i las cumbicçones cumo ua peinha), iba you dezindo, anton, que you nun sou capaç de momientos de fino recorte cumo eilha, i quien nun puode, arreia.

Assi i todo, na mie cundiçon de probe i houmilde mortal, tamien sou assaltado por anterrogaçones i dúbedas eizistanciales que gostaba de partelhar culs eilustres besitantes deste blogue, ne l santido de le podéren botar ua mano a este zbalido i angustiado sprito anqueto que bos scribe.

Ye animado por esta spráncia que pido la buossa ajuda de cunhecedores spurmantados para çfazer este einigma que me ten anubrado ls dies, me apunah l curaçon i me cega para la certeza de la berdade.

Nun deixeis que este bózio de socorro se perda na scuma de ls dies i trazei-le algua paç a esta alma atermantada c'ua repuosta einequíboca que me faga ber las cousas claras cula lhuç de la buossa rezon i me saque de la lhagona de auga choca de dúbedas adonde me afondo.

Isto que eiqui sembrórun ye pan?...

ó será que fui cebada?!...

"L mundo serie un sítio muito más buono se ls homes fúran capazes de dezir que chóran i las mulhieres pudíran cunfessar que se mastúrban!"

Fuorça, camarada Basco, nós seremos la muralha d'aço!

Nunca cuidei que este serbiço de scolher la personalidade de la semana - un einequíboco ato de cidadanie i de serbiço público - fura cousa tan pouco custosa; quando me apus a cordenar la quemisson que scuolhe la dita personalidade, staba cumbancido que íban a ser riuniones anterminables, relatórios de miles de páiginas i outras fodices dessas culidade. Qual quei!, isto ye solo 5 minutos, ua boltica puls jornales i, tate, personalidade scolhida por ounanemidade i aclamaçon, peç que anté s'ampúrran para ber quien fai ó diç l maior çparate i lhieba l galardon.

Esta semana tamien nun hai renhonhós, l prémio bai anteirinho par'este senhor, l camarada Basco.

Anton nun quereis saber que l senhor doutor Basco Graça Moura, diretor de l Centro Cultural de Belen, madou dezir, por scrito! que nun fui ua cumbersa qualquiera de taberna, i mandou anton dezir que se staba cagando nas ordes de l goberno que le paga la soldada, i que ne l sou serbiço quien mndaba era el i las cousas se habien de fazer cumo le dira na gana. Ala a mandar pal caralho ls corretores outemáticos de ls cumputadores i a cuntinar a screbir cumo l mestre scuola mos ansinou, que nun ye cá agora meia dúzia de doutores feitos culs brasileiros que mos ban a dezir a nós que Ps i que Cs ye que hemos de screbir.

Oh pá, que marabilha! Puta que pariu, yá ye perciso tener colhones! Nun ye todos ls dies que se bei assi un çafardana mandar foder i ancher de burro a quien le paga i star-se cagando pal resultado.

Claro que eiqui mos ponemos, einequíboca i ancundicionalmiente, al lhado de un home desta coraige. Nó por bias de l caralho de l Acordo Ourtográfico, i muito menos pula pureza de la lhéngua pertuesa, para isso stamos-mos nós bien cagando, quei caralho mos amporta a nós que se ponga P ó hifen ó l caralho, para la tençon que tenemos de gastar muita tinta, meia dúzia de mansaiges ne l telemoble chégan-mos bien... mas claro que le damos fuorça al home, que mos gústan assi uas sinagogas i uns scabeches, solo para ber l circo a arder (i eiqui circo nun ten santido conotatibo, sien querer oufander ls circos, que ténen palhaços bien más sérios que estes triteiros).

I ye que apuis inda hai que ber outra cousa: cumo le déixen lhebar la zízara palantre al camarada Basco, i cumo nun le déien uas patadas balientes ne l culo para l meio de la rue, i nun le fágan tornar a dar l denheiro que yá le pagórun - i l que ban a gastar para cumponer outra beç ls cumputadores - isso anton, caralho, ye que bai a ser bonito!

Ye que se nun houbir naide cun colhones para chamar l senhor doutor a capítelo, anton, caralho, adonde l filho de miu pai trabalha tamien se puoden purparar para uas modeficaçones i nun hai acá filhas de la puta de modernices niuas. Ls cumputadores fodo-los you culs corretores antigos i isto anquanto nun fago salir un memorando anterno a anformar las funcionárias que a partir d'agora las saias ténen que ser un palmo porriba de l zinolho i ls trés betones cimeiros de ls xambres ténen que star siempre zabetonados.

Ah, i que ten l retrato a ber cul prémio?! Ora caralho, cumo leitores de l Ourrieta julgába-bos más finos; bós cunheceis bien l calatriç de l senhor doutor Basco Graça Moura?! Nun m'afódades, nun queriedes que punisse eiqui uns çufinos daqueilhes a spantar la caça!... pongo ua de las rapazas de l CCB, apurada a ber de zanstalar ls nuobos corretores... bah, ide mas ye alhá bós a cebá-bos al retrato de la rapazica que nun benistes eiqui par'outra cousa.