Terça-feira, 13 de Setembro de 2011

Londres

 

Aposque stábades todos a spera de nuobas de Londres… Ah!, pois!!! I sou you que bos las bou a dar.

Diç-me Cáncia quando l aperponi que screbíssemos ambas a dues cumo que an diálego: Bá, scribe tu mulhier, yá que ampeceste a aguçar la buntade, agora anfareia-ls cun las nuobas. Scribe, scribe, qu´apuis scribo you pa l´outra beç.

S´acauso pensais que passemos esses dies a rebolcos an refustedo, stá  redondamente anganhado quien assi pensar. Cáncia yá dou probas de que ye ua pessona culta. You, anque nun tenga amostrado la cultura giral que Çáncia yá dou probas, tamien me antresso por más cousas que a la pormeira aspareça. Gústan-me las biaijes i, quando bou a un paíç ó cidade lhiebo siempre las notas que tirei de la anternete cun todo l que quiero besitar.

 

Claro que,  se calhar ajuntá-se todo, tamien a nós mos gusta coincer mais anatomies masculinas, an çfrentes lhénguas.

Íbamos cun eilha fisgada. Arranjar dous angleses, eilhes que, statísticamente son ls mais fodidores. Apuis pensemos, qual statística qual raios! La statística fai-me lhembrar aqueilha de l polho que se diç que cada pertués come an média meio frango; la porra ye que hai quien coma un i hai quien nun coma nien un cibico… A rebolcos na cama ye la mesma: Hai quien deia rebolcos i más rebolcos, seguidos, la nuite chena de streilhas na cama i, hai quien  seia que nien un bui de cubriçon ne l més d´Agosto,  que la baca touronda nun  seia capaç de l fazer chubir la berga.  Assi, deixemos que las cousas fússen acuntecendo i na berdade acuntecírun, porque sien mos querermos gabar, somos dues morenas antulhadiças.

Na sesta fumos de l airoporto pa l houtel que quedaba a pie de Covent Garden, adonde mal salimos para dar ua caminada, lhougo assistimos a un cuncerto de música clássica, porreiro, alhá andrento de l eidefício, no pátio ambaixo. Nós quedemos anriba cumo que nua “mesanine” a scuitar i a mirar pa la ourquestra i pal sou chefe que todo se meneaba para que Bach fura anterpetado an porfeitos sonidos. Antes d´entrar habie ua quelóquio de ruga. Para quien nun conheça, este ye un sítio adonde ls artistas amóstran la sue arte. Tamien an Picadilly, mas nesse causo mais pintores, que to las nuites zeinhan retratos a quien querga serbir de modelo. Tamien a Picadilly nós fumos.

 

Çáncia nunca habie stado an Londres. You yá habie stado dues bezes, ua sumana de cada beç, de modo i maneira que dei cartas a Çáncia i l amostrei todo l que de más amportante hai an Londres.  Acabemos por quedar mais tiempo. Benimos hoije a la pormanhana, arrimado a meidie.

Calçadas cun calçado cunfortable i roupa tamien, çaracutiemos la cidade no poremiro die para quedar cun l´eidé giral. A cada ziquetrac entrábamos ne l Metro para adelantrar un pouco i apuis saliemos na staçon adonde houbísse algo para ber. Assi fui un die cheno. Al passar na Leichester Square fumos a mercar belhetes para a la nuite ir a ber “les Miserables”, basiada ne l remanse de Victor Hugo, puis que neste sítio son mais baratos que na belheteira.

 

Stabamos nós a ber ls lhugares i aparécen-mos dous moços, que sigundo eilhes, yá mos habien chitado i seguido. Guapos e eilegantes de morrer… Spanholes inda porriba, eiqui bezinos, a falar ua lhéngua tan asparecida a la nuossa. Yá nun se mos lhembrórun las statísticas aqueilhas. Bimos l quelóquio yá juntos, sérios, mais sérios que crente na Sumana Santa, porque la stória assi pedie. Apuis fumos para Picadilly, buímos uns copos i anquanto i nó treminemos l porgrama para deimingo i sigunda. Apuis andebimos siempre juntos. José i Miguel  son homes que muito mos ansinórun a nible de stória, quando besitemos i mos splicórun todo ne l Museu Británico. La Piedra de la Roseta! Abri la boca de ambaçbacada…Aquilho que habie studado an Stória…

Tamien fúrun bien lambones estes angleses!… Peç que trazírun mei Eigito, dixe you.

Miguel, storiador, splicou-mos todo. Aqueilha boca por adonde salie tanta sabedorie, ancandilou-me. Gusto de homes cultos i que me ensínen l que nun sei. Ende teneis! L sexo nun chega a ua mulhier… Un home ten que ser muito mais que rebolcos, para an rebolcos lhebar la mulhier fura de sous terrenos...

 

Apaixonei-me por Miguel i el por mi tamien. Moramos acerca i esso facelita; el  an Çamora, you ne l Praino. Jesé i Çáncia l mesmo, solo que Çáncia nun ye de se apaixonar cun dues cantigas, cumo eilha bos dirá se quejir. You si. Atiro-me de cachafun…

Nessa nuite fumos a beilar. La calor fui chubindo pul cuorpo,las quelubrinas atelundrórun  l terreno desioso, las manos fúrun deseios a chubir na carne i mos lhebórun pal houtel nua biaije de Metro que parecie nunca mais acabar. Alhá, las statísticas yé nun cuntában, para quei númaros frius na calentura de ls nuossos cuorpos nun beilar tan cierto, nun bai i ben, torna a ir i a benir, cumo se l tango tebisse sido anseiado al lhargo de la bida… Ui, que biaije!!! L sexo anruseirado an cultura ye outra cousa, caralcho! Un macho storiador a bater todas las statísticas…

Çáncia, se eilha quejir, bos cuntará.

 

Quedou treminada outra biaije para deiqui a un més, desta beç a Berlin adonde hé-mos de cuntinar l studo de las cousas eigípcias. Até allhá, l Praino i Çamora son acerquita...

Quien iba a dezir! Ua biaije pensada para  ourgies i bacanales, acabar an paixon...

 

 

publicado por Figénia às 15:59
link do post | comentar | Adicionar als purferidos
|
Creative Commons License
This work is licensed under a Creative Commons Attribution-NonCommercial-ShareAlike 3.0 Unported License.

.Partecipar

. Partecipar neste blogue

.Ls Outores

.Antradas

. Cun Deboçon mas sin Perbe...

. Bacanças ne l Lhitoral

. Belas firmes, hasteadas i...

. La Rata Znuda

. 30 anhos ó mais

. McGregor

. Ancontro de bloguers

. Bien mos podemos anganhar...

. Passeio de bicicleta pu l...

. Que mundo ye este?!

.Arquibos

. Janeiro 2014

. Agosto 2013

. Outubro 2012

. Setembro 2012

. Junho 2012

. Maio 2012

. Abril 2012

. Março 2012

. Fevereiro 2012

. Janeiro 2012

. Dezembro 2011

. Novembro 2011

. Outubro 2011

. Setembro 2011

. Agosto 2011

. Julho 2011

. Junho 2011

. Maio 2011

. Abril 2011

. Março 2011

. Fevereiro 2011

. Janeiro 2011

.tags

. todas as tags

.Janeiro 2014

Dom
Seg
Ter
Qua
Qui
Sex
Sab

1
2
3
4

5
6
7
8
9
10
11

12
13
14
15
16
17
18

19
20
21
22
23
24
25

26
27
28
29
30
31


.Lhigaçones

.antolhados


Estadisticas gratis

Contador de visitas
blogs SAPO

.subscrever feeds