Quarta-feira, 21 de Setembro de 2011

Ando mui aperriada

 

... la mie bida bolbiu-se nua cunsemiçon çque l ourganizaçon adonde you trabalhaba fui a la faléncia i quedei de calças na mano, ne l meio de la ruga, que ye cumo quien diç, sien trabalho i sien l´oudenado de ls dous últimos meses.

Que fago you agora!? Alhá meti un papel para poder fazer algo çfrente, ansinar.

Catorze horas que nien me dan quaijeque para quemer, quanto mais para luxar, pagar las prestaçones de la casa i de l altenóble, gasólio para passiar i todo l mais que ua mulhier percisa para bibir cumo you yá me habie aquestumado. Custa andar de cabalho para burro, ai se custa!!! Inda porriba ando aperriada de trabalho puis nun staba aquestumada a esse género de cousas.

 

Dou buoltas i mais que buoltas al miolho para ber l que hei-de you fazer para apelidar mais uns ouros. Tengo que arranjar seluçon. Que fago  you  s´    adrega tiráren-me l carro, l miu Mercedes tan pimpon, por nun tener denheiro para pagar!

Iba you nestes pensares quando adelantre beio  placas a andicar que stou a chegar a Çamora.

Chube, diç-me Miguel, apuis que toquei no sesto squierdo.

Quando sali de l eilebador yá el me speraba a la puorta, inda cun la lupa na mano.

tengo que acabar de decifrar esta página, apuntou el pal lhibro de fuolhas scurecidas puls anhos.

 

Fui solo chegar-me un cachico mais adelantre i drubar-me parriba un cibico! Atchin! Atchin! Atchin!!!

Zatei a spirrar i slhagrimar que nunca mais paraba. Arre catancho, esta pegou-me sien peç! Cumo ye que you fago agora cun esta becheza de ls lhibros i cun un cumbersado storiador siempre cargado de lhibros para ambestigar, se, a fin de cuontas, you sou alérgica a esta merdaria de antiguidades!?

 

Chegou-se i puso-me las manos ne ls mius ombros çtapados, para me fazer uns carinos. Mais you spirraba...

 

Bai-te a lhabar, home de Dius! Tenes dessa becharia als muntones!

Fui la pormeira beç que nun antrei pa la banheira cun un macho. Noutras circustáncias el me sfregarie a mi i you a el até que l xabon botasse scuma para que las manos se sgobiássen, ls cuorpos se ancustássen, se perdíssen ambaixo la cachoneira d´áuga morna que benie de l chubeiro, mesmo anriba. Habie-mos de mos meter na banheira de sguichos, a sguichar subre nós i a faé-mos medrar.

 

Quedei a spera que l´auga lhebasse aqueilha caterba de bichos pequerruchicos que se acócan ne puolo. Un cachico apuis chegou Miguel anrebulhado nua toalha i todo prefumado. Ui que bien cheiras!, dixe-le you a abraçá-lo. Agora bou you a lhabá-me.

 

Deilhi a pouco era you que benie anrebulhada na toalha. Miguel yá staba znudo i an sfregantes znudou-me a mi. Atchin! Atchin!!

Nun houbo modo de atamar aqueilha spirrarie. Atchin! Atchin!!! Tenes que lhebar esse lhibro de la tue mesinha de cabeceira, se nó, nun teneremos calmantes naturales. I se you tamien stou a percisar!...

Atchin! Atchin! Foda-se Miguel, tengo que te lhabar cun augarrás!...

Ls uolhos staban lhagrimosos, de l nariç pingaba ua augadielha anquelor, ls spirros yá me tenien cansada...

 

Apuis fumos pala cozina, para spormentar s´alhá nun habie requícios daqueilha becheza de ls lhibros i serbirie de qualquiera maneira.

Tamien habie!

Salimos de casa, chamemos l´eilebador i deixemos ua frincha abierta  para que nun oubedecisse a naide.

Atchin! Atchin!

Apuis, meio atafanhada, dixe-le:

Que hémos de fazer Miguel!?

El anculhiu-se...

Tenerás que ir tu a mie casa, dixe you cun ua boç roufeinha.

 

Esto nun bai a tener grandes piernas para caminar, pensei you para mius betones...

 

 

publicado por Figénia às 14:35
link do post | comentar | Adicionar als purferidos
|
Creative Commons License
This work is licensed under a Creative Commons Attribution-NonCommercial-ShareAlike 3.0 Unported License.

.Partecipar

. Partecipar neste blogue

.Ls Outores

.Antradas

. Cun Deboçon mas sin Perbe...

. Bacanças ne l Lhitoral

. Belas firmes, hasteadas i...

. La Rata Znuda

. 30 anhos ó mais

. McGregor

. Ancontro de bloguers

. Bien mos podemos anganhar...

. Passeio de bicicleta pu l...

. Que mundo ye este?!

.Arquibos

. Janeiro 2014

. Agosto 2013

. Outubro 2012

. Setembro 2012

. Junho 2012

. Maio 2012

. Abril 2012

. Março 2012

. Fevereiro 2012

. Janeiro 2012

. Dezembro 2011

. Novembro 2011

. Outubro 2011

. Setembro 2011

. Agosto 2011

. Julho 2011

. Junho 2011

. Maio 2011

. Abril 2011

. Março 2011

. Fevereiro 2011

. Janeiro 2011

.tags

. todas as tags

.Janeiro 2014

Dom
Seg
Ter
Qua
Qui
Sex
Sab

1
2
3
4

5
6
7
8
9
10
11

12
13
14
15
16
17
18

19
20
21
22
23
24
25

26
27
28
29
30
31


.Lhigaçones

.antolhados


Estadisticas gratis

Contador de visitas
blogs SAPO

.subscrever feeds