Quarta-feira, 29 de Fevereiro de 2012

Se até ls bichos gústan...

{#emotions_dlg.sarcastic}

 

,...cumo nun hán-de gustar ls pertueses!?

 

publicado por Figénia às 11:00
link do post | comentar | Adicionar als purferidos
|
Sexta-feira, 24 de Fevereiro de 2012

A perpósito de l ourgasmo femenino

Puode ser que un que you porqui tengo bido nun l pareça mui bien l que bou a dezir cun esta prelhiendra que bou a botar. Parece-me a mi que esse tiu se stá a cagar para isto, puis l que el gusta ye ousar las mulhieres an sou porbeito. Para el i para todos ls machistas que nun s´amportan cun l prazer de las mulhires ban estes recados.

A las bezes oubo l porgrama de l´Antena Trés, La Hora de l Sexo, adonde un tiu cumbersa cun ua rapaza que cun el fai l porgrama. Fala-se de todo cun toda la naturalidade, sien bergonhas ó percunceitos. Tamien you gusto de falar assi subre estas cousas que son tan naturales cumo quemer ó resfolgar. Bá, mas cun estas i cun outras yá staba a salir de la torna que eiqui hoije me truixo- l ourgasmo femenino.

Ua mulhier ten que ser topada. Se l tiu nun sabe fazer bien esses remissacos todos para qu´eilha quede cun la frauga caliente, tenerá que ser eilha a dezí-le an que puntos i cun que macieç l debe fazer. Nun hai mulhieres fries mas si homes desajeitados. Ora, l punto percipal para alhá de ls carinos ye l clitóris, sendo, sigundo el, nua grandura de treze centímetros, de riba de l capulho anté l forro de l canal baginal. Será que todo mundo sabie isto? Todo mundo sabie que todo aquel anchaço cun que queda la mulhier an sous múscalos de l´antemidade, que tan bien acunchégan las bergas, séia eilhas de que grandura fúren, todo isso, dezie, ye clitóris!? Mirai que you tamien nun l sabie i bendo-bos-la cunsante la merquei.

Muita beç, ó porque la mulhier nun stá caldiada, ó porque nun ye capaç de se lhibartar de ls porblemas de l die, nun ye capaç de chegar a l´ourgasmo i acaba assi cumo quien ceba i nun mata. 

Apuis, puode acuntecer que eilha faga de cuonta que si, i finge cun sues artimanhas, l ourgasmo.

Percuraba la rapaza de l porgrama: Mas ye bien que la mulhier faga de cuonta?

Claro que nó, dezie Quintino. Fazer de cuonta que si só agraba la queston, mas pior que isso, ye l home nun se dar de cuonta.

Quando assi Quintino dixo, ( you trato-lo assi porque you i el somos tu acá, tu alhá. El mandou-me falar destas cousas an Mirandés). Diç el: ye amportante que se fale de sexo an todas las lhénguas.

Cumo iba dezindo,  lhembrou-se-me de l que bos falei ne l ampeço, a perpósito de Poucabergonha. Se todo mundo yá sabie de quien you staba a falar, porquei nun amantar no sou nome? El nun se debe dar de cuonta de ls ceçares que se faien andrento de la mulhier apuis qu´eilha passou para alhá de l punto de rebuçado i, l mais cierto ye acarditar siempre ne ls gemidos.Talbeç mais machista que nécio...

 

Até qualquiera die!

 

 

 

 

publicado por Figénia às 04:50
link do post | comentar | Adicionar als purferidos
|
Quarta-feira, 22 de Fevereiro de 2012

Stou biba!!!!

Apuis daqueilhas nuobas que bos dei, quando bos dezie, pula mano de Çáncia, que serie la redadeira beç que eiqui bos falarie, muita cousa mudou.

Na mie bida, na maneira cumo l´ancaro, la maneira cumo la bibo.

You fui ua zarregrada an atos i deseios, an práticas i bibéncias.

Stube a las puortas de la muorte, fraquita, sien fuorças, cun l cuorpo cargadico de xagas. Todo se m´agarraba porque l miu sistema eimonulógico staba sien fuorças para lhuitar contra qualquiera malina. Ls sintomas éran de Sida. Fiç las análeses i benie cunfirmada. Soubo-se apuis que habie habido anganho. Cun ls antibirales que staba a meter ne l cuorpo solo me fazien quedar inda mais mala. Apuis houbo un doutor que quijo cunfirmar l´análese i biu que nun era nada disso mas si un problema grabe de sangre que agora feliçmente stá curado.

Todo isto me dou mais fuorça para bibir i saber bibir. Nun quiero cuntinar a lhebar la bida que lhebei, de orgies, de trocar de home sien l coincer i tener sexo sien camisica, sien saber se podie tener.

Stou cun Miguel i nun stéiades a babá-bos yá, cun las partes a queréren arrebentar las calças, sien campo i cun ganas de salir, porque nun bou a cuntar nada de l que fazemos na nuossa antemidade. Bou a falar de todo abiertamiente mas nunca cuntando l que pratico, mas unicamente cun base an spriença cumo se fura ua secçóloga.

Algua cousa hei-de screbir mas las mies cuontas nun ténen cumparança cun las d´antiempos. Stou prenhada d´un nino que nacerá alhá para Julio, amo a Miguel, nun quiero mais naide i, quando se ama i se ten ua bida cun eideias de feturo nun se cunta l que se passa, anque se cuntine a tener ua bida chena de abinturas eiróticas.

Stou biba i,... stou demudada.

Tan bárbaro fui l cagaço cumo fui la mie mudança...

 

Bien haias Çáncia, por todo l que por mi faziste.

 

publicado por Figénia às 15:07
link do post | comentar | Adicionar als purferidos
|
Sábado, 18 de Fevereiro de 2012

Dúbeda de l die

 

 

You nun puodo amparceirar cula mie cumpanheira de blogue, la senhora dona Çáncia de la Ancarnaçon, que Dius le guarde por muito i bun anho las manos que tan buonos scritos mos oufrece, que you, cumo iba dezindo, nun tengo cabeça ( a bien dezir, nien cabeça, nien filha de la puta de pacéncia niua para essas merdices...) para reflexones i pansamientos tan perfondos i cismáticos cumo aqueilhes cun que eilha ten la delicadeza de chubir l nible deste spácio de cultura i de eilustraçon, i inda bien que assi ye... (yá bou mei perdido ne l caralho de l filo de la miada, pareço un político a falar, caralho m'afoda, que a meio de la frase se me squece l que iba a dezir, ye l que dá tener las eideias bien firmes i las cumbicçones cumo ua peinha), iba you dezindo, anton, que you nun sou capaç de momientos de fino recorte cumo eilha, i quien nun puode, arreia.

Assi i todo, na mie cundiçon de probe i houmilde mortal, tamien sou assaltado por anterrogaçones i dúbedas eizistanciales que gostaba de partelhar culs eilustres besitantes deste blogue, ne l santido de le podéren botar ua mano a este zbalido i angustiado sprito anqueto que bos scribe.

Ye animado por esta spráncia que pido la buossa ajuda de cunhecedores spurmantados para çfazer este einigma que me ten anubrado ls dies, me apunah l curaçon i me cega para la certeza de la berdade.

Nun deixeis que este bózio de socorro se perda na scuma de ls dies i trazei-le algua paç a esta alma atermantada c'ua repuosta einequíboca que me faga ber las cousas claras cula lhuç de la buossa rezon i me saque de la lhagona de auga choca de dúbedas adonde me afondo.

 

 

 

Isto que eiqui sembrórun ye pan?...

 

 

 

 

 

 

 

 

 

 

ó será que fui cebada?!...

 

 

 

 

 

 

 

 

 

 

 

 

 

publicado por poucabergonha às 01:06
link do post | comentar | Adicionar als purferidos
|
Segunda-feira, 13 de Fevereiro de 2012

Pansamiento de l die

 

 

 

 

 

 

 

"L mundo serie un sítio muito más buono se ls homes fúran capazes de dezir que chóran i las mulhieres pudíran cunfessar que se mastúrban!"

 

 

 

 

 

 

publicado por Çáncia de la Ancarnaçon às 23:24
link do post | comentar | Adicionar als purferidos
|
Domingo, 5 de Fevereiro de 2012

Personalidade de la semana 3

 

 

 

 

 

 

Fuorça, camarada Basco, nós seremos la muralha d'aço!

 

Nunca cuidei que este serbiço de scolher la personalidade de la semana - un einequíboco ato de cidadanie i de serbiço público - fura cousa tan pouco custosa; quando me apus a cordenar la quemisson que scuolhe la dita personalidade, staba cumbancido que íban a ser riuniones anterminables, relatórios de miles de páiginas i outras fodices dessas culidade. Qual quei!, isto ye solo 5 minutos, ua boltica puls jornales i, tate, personalidade scolhida por ounanemidade i aclamaçon, peç que anté s'ampúrran para ber quien fai ó diç l maior çparate i lhieba l galardon.

Esta semana tamien nun hai renhonhós, l prémio bai anteirinho par'este senhor, l camarada Basco.

Anton nun quereis saber que l senhor doutor Basco Graça Moura, diretor de l Centro Cultural de Belen, madou dezir, por scrito! que nun fui ua cumbersa qualquiera de taberna, i mandou anton dezir que se staba cagando nas ordes de l goberno que le paga la soldada, i que ne l sou serbiço quien mndaba era el i las cousas se habien de fazer cumo le dira na gana. Ala a mandar pal caralho ls corretores outemáticos de ls cumputadores i a cuntinar a screbir cumo l mestre scuola mos ansinou, que nun ye cá agora meia dúzia de doutores feitos culs brasileiros que mos ban a dezir a nós que Ps i que Cs ye que hemos de screbir.

Oh pá, que marabilha! Puta que pariu, yá ye perciso tener colhones! Nun ye todos ls dies que se bei assi un çafardana mandar foder i ancher de burro a quien le paga i star-se cagando pal resultado.

Claro que eiqui mos ponemos, einequíboca i ancundicionalmiente, al lhado de un home desta coraige. Nó por bias de l caralho de l Acordo Ourtográfico, i muito menos pula pureza de la lhéngua pertuesa, para isso stamos-mos nós bien cagando, quei caralho mos amporta a nós que se ponga P ó hifen ó l caralho, para la tençon que tenemos de gastar muita tinta, meia dúzia de mansaiges ne l telemoble chégan-mos bien... mas claro que le damos fuorça al home, que mos gústan assi uas sinagogas i uns scabeches, solo para ber l circo a arder (i eiqui circo nun ten santido conotatibo, sien querer oufander ls circos, que ténen palhaços bien más sérios que estes triteiros).

I ye que apuis inda hai que ber outra cousa: cumo le déixen lhebar la zízara palantre al camarada Basco, i cumo nun le déien uas patadas balientes ne l culo para l meio de la rue, i nun le fágan tornar a dar l denheiro que yá le pagórun - i l que ban a gastar para cumponer outra beç ls cumputadores - isso anton, caralho, ye que bai a ser bonito!

Ye que se nun houbir naide cun colhones para chamar l senhor doutor a capítelo, anton, caralho, adonde l filho de miu pai trabalha tamien se puoden purparar para uas modeficaçones i nun hai acá filhas de la puta de modernices niuas. Ls cumputadores fodo-los you culs corretores antigos i isto anquanto nun fago salir un memorando anterno a anformar las funcionárias que a partir d'agora las saias ténen que ser un palmo porriba de l zinolho i ls trés betones cimeiros de ls xambres ténen que star siempre zabetonados.

Ah, i que ten l retrato a ber cul prémio?! Ora caralho, cumo leitores de l Ourrieta julgába-bos más finos; bós cunheceis bien l calatriç de l senhor doutor Basco Graça Moura?! Nun m'afódades, nun queriedes que punisse eiqui uns çufinos daqueilhes a spantar la caça!... pongo ua de las rapazas de l CCB, apurada a ber de zanstalar ls nuobos corretores... bah, ide mas ye alhá bós a cebá-bos al retrato de la rapazica que nun benistes eiqui par'outra cousa.

publicado por poucabergonha às 01:51
link do post | comentar | Adicionar als purferidos
|
Sexta-feira, 3 de Fevereiro de 2012

Rascunho

Neste blogue ye todo mundo giente séria i filha de buonas famílias. La nuossa ética pessonal i la repunsablidade delantre de ls stimados leitores de l blogue nun se cumpadece cun géstios menos sérios i que puodan anganhar ó scunder algo a todos ls que ténen l  respeitable questume de buer cultura i cunhecimiento nas nuossas páiginas. Ó, dezido de ua maneira más clara, eiqui la berdade ye filha de Dius i naide stá para scunder caralho de segredo niun!

Ye neste santido, i ne l más alto respeito puls leitores, que mos astrebemos a publicar un rascunho que ancuntramos eiqui ne l arquibo de l blogue i que, stamos ciertos, l'outora muito agradecerá que ls publíquemos (tenemos para nós que se le squeciu de fazer post al fin de l screbir).

Más a más, l assunto - la delinquéncia de ls jobes - ye de toda l'atualidade i de la más grande amportáncia para la formaçon de la geraçones más nuobas, isto para nun amantar na subtileza i randelhado de l testo, screbido nun registo superior, tirando-se meia dúzia de erros ourtográficos de ls gordos, que nós, nun géstio de amisade i altruismo, tubimos la houmildade de corregir, atitude que nun merece agradecimientos i que más queriemos que nun fura cunhecida de naide.

I agora la licion de cidadanie de la nuossa cumpanheira de scrita, stimamos que la mocidade puoda aporbeitar:

 

 

Era ua nuite serena i sien tránzito. You andaba a strenar l miu carro nuobo, que l miu xefe m'oufreciu apuis de biaige que fazimos para las Caraíbas, a tratar de negócios de l'ampresa. Sali de Lisboua i meti-me pula outostrada camino de la nuossa querida Miranda. Cumo nun me gusta andar pulas squinas i pulas bordas, que me fai lhambrar outros tiempos de la mie bida, ancarreirei l carro pula mano squierda, mas siempre drento de ls lhemites mássimos de belocidade, que era 70 Km/h, cumo you bien habie arreparado na placa azul que habie na borda de la strada.

Nisto, aparece trás de mi un desses carros anfeitados de l tuning. Nun le bundaba benir cun belocidade a más, que inda se me colou a la traseira de l carro, aquilho solo bendo: parecie ua çcoteca, era solo lhuzes a piçcar i la música als bózios, viuuu, viuuu, viuuu, viuuuu.... Pus nun quereis saber que al fin de uns quilontros trás de mi naquel çparate a zapaçanciá-me, ban i pássan-me PULA DREITA!

Estes habien de ser uns quantos, que benien nua carrinha, dessas quemerciales, branca i chena de outocolantes de tuning cul nome de la quadrilha ó de l gangue, cumo le cháman. L que eilhes nun sáben ye que, mesmo sendo de nuite, you le bi las letras. Nun sei l nome de la quadrilha, mas yé tengo las einiciales i nun tardo a lhebá-las al posto de la guarda: INEM.

Nun hai dreito! Bai ua pessona respeitadora, que paga ls sous ampuostos, i aparece assi ua recla de sebandijas, capazes de le fazer tener un zastre a un!

Quando ye que nuosso goberno fai algo para acabar cun estes salbaiges nas stradas de l paiç?!

 

 

 

 

L rascunho nun tenie data, mas staba assinado Çáncia de la Ancarnaçon

Claro que l retrato fui you que lo acreçantei, que l achei apropiado.

 

 

 

 

 

 

 

 

 

 

 

 

publicado por poucabergonha às 23:12
link do post | comentar | Adicionar als purferidos
|
Creative Commons License
This work is licensed under a Creative Commons Attribution-NonCommercial-ShareAlike 3.0 Unported License.

.Partecipar

. Partecipar neste blogue

.Ls Outores

.Antradas

. Cun Deboçon mas sin Perbe...

. Bacanças ne l Lhitoral

. Belas firmes, hasteadas i...

. La Rata Znuda

. 30 anhos ó mais

. McGregor

. Ancontro de bloguers

. Bien mos podemos anganhar...

. Passeio de bicicleta pu l...

. Que mundo ye este?!

.Arquibos

. Janeiro 2014

. Agosto 2013

. Outubro 2012

. Setembro 2012

. Junho 2012

. Maio 2012

. Abril 2012

. Março 2012

. Fevereiro 2012

. Janeiro 2012

. Dezembro 2011

. Novembro 2011

. Outubro 2011

. Setembro 2011

. Agosto 2011

. Julho 2011

. Junho 2011

. Maio 2011

. Abril 2011

. Março 2011

. Fevereiro 2011

. Janeiro 2011

.tags

. todas as tags

.Janeiro 2014

Dom
Seg
Ter
Qua
Qui
Sex
Sab

1
2
3
4

5
6
7
8
9
10
11

12
13
14
15
16
17
18

19
20
21
22
23
24
25

26
27
28
29
30
31


.Lhigaçones

.antolhados


Estadisticas gratis

Contador de visitas
blogs SAPO

.subscrever feeds