Terça-feira, 18 de Janeiro de 2011

MacCoy

You chamo-me Çáncia i sou mirandesa. Jesé cumbidou-me para screbir eiqui i diç que podie screbir subre l que quejisse i cume quejisse i, sendo assi, you aceitei. Nó que tenga algo de amportante a dezir-le al mundo, mas cume Jesé ye miu amigo hai tanto tiempo i l cumbite fui cun tan buonos modos…

Ampeço cun ua passaige de miu sobrino, i you solo l sei porque de beç an quando sou you, cumo tie, que l ajudo a fazer ls trabalhos de casa.

 

 

 

 

La porsora mandou fazer ua redaçon subre sexo ou algo relacionado cun esse tema. A soutordie cad’un liu la sue redaçon: Joana falaba de cuntracetibos, Zé de masturbaçon, Rita falou de rituales sexuais antigos, Rui de homosexualidade...
Chegou la beç de Norberto, miu sobrino, I l garoto ampeçou cun boç firme.

 

“Era ua beç, ne l bielho oueste, hai muito, muito anho. L reloijo de l’eigreija daba las siete de la tardica. Nubres de polareda arrastrában-se pula cidade mei’zerta. L sol inda rechinaba ne l hourizonte i tenhie las nubres de sangre.

De rumpon, al loinge, assomou la figura de un home a cabalho. Debagar, fui-se arrumando a caras a la cidade. Al chegar al ampeço de la rue prancipal, abeixou-se de l cabalho. L siléncio era pesado i sentiu-se l telincar de las sporas.

L cabaleiro chamaba-se MacCoy. Estaba todo bestido de negro, tirando-se un lhenço burmeilho anroscado nas golas i la fibela de prata cun que asseguraba las dues pistolas als quadriles.

L cabalho, camarada de muita andança, zbiou-se dalgeiro, a caras a ua poça d’auga.

 

TAU! TAU! TAU!

 

L cheiro a pólbera salie de la pistola que yá habie tornado para la cintura de McCoy. El nun gustaba de cabalhos spúrios.

 

MacCoy fui a caras a la taberna. Un probe de pedir que staba a la puorta acrucado a drumir, spertou i topou-le na pierna a MacCoy, cun l chapeu stantido a pedir ua smola.

 

TAU! TAU! TAU!

 

MacCoy nun gustaba que le topássen. Antrou na taberna.

Arrumou-se al balcon i pediu ua cerbeija. L ampregado dou-la. MacCoy porbou.

 

TAU! TAU! TAU!

 

MacCoy nun gustaba de cerbeija morna. Las pessonas mirórun spantadas para MacCoy.

 

TAU! TAU! TAU!

 

MacCoy nun gustaba de juntouros nien que armássen sinagogas.

Saliu de la taberna i zbiou-se pa l outro lhado de la cidade para cumprar un cabalho. Passou un tagalhico de garotos a correr a la borda del.

 

TAU! TAU! TAU!

 

MacCoy nun gustaba de puolo i inda para mais ls garotos íban a boziar i a MacCoy nun le gustaba l barulho.

Cumprou l cabalho i quando pagou l duonho anganhou-se a zbirá-le l troco.

 

TAU! TAU! TAU!

 

MacCoy nun gustaba que se anganhássen nas cuntas. Saliu de la cidade

Cun l sol yá quaije a çponé-se, la figura de MacCoy recortou-se acontra l hourizonte. L siléncio era pesado. FIM”  



Norberto calhou-se.
La porsora i l restro de ls garotos stában barados.
 La porsora, anraibada, pregunta-le:

- Si, mui bien, mas quei ten la tue redaçon que ber cun sexo?

Cun las manos ne ls bolsos, a mirar pa l chano adonde zenhaba uns garabatos cun la punta de l çapato, Norberto çpara-le:

 

- Anton?! L MacCoy era fodido.

 

 

 Çáncia de l'Ancarnaçon

 

 

publicado por Jesé Silba às 00:47
link do post | comentar | Adicionar als purferidos
|
3 comentairos:
De amadeuf a 22 de Janeiro de 2011 às 23:18
Carai,

Esta Çáncia de la Ancarnaçon ye mesmo fuorte an redaçones.
Cun ua scritora destas l mirandés eirá inda mais loinge i mais alto.
Solo nun antendo cumo ye que nun blogue cun tanto retrato nun ponistes acá l buossao, á Çáncia.
Nun teneis que bos acanhar.
Desta gustei. Parabienes.
AF


De Boieiro a 23 de Janeiro de 2011 às 15:52
Anton buonas tardes a toda la Ourrieta:)
Á McCoy dun dianho que inda era más spúrio que l cabalho.
Béngan muitas destas que assi l sol nacerá an beç de se çponer más strelhumbroso.


De calros f a 25 de Janeiro de 2011 às 17:24
Magnífica redaçon i melhor salida de Norberto.
Esta faç-me lhembrar ua de quando you andaba na quarta classe.
Nun percípio de tarde, l porsor chegou a la scuola algo carregado cul bino de l almuoço. Nada que nun fusse yá hábito, mas andabamos a dar l apareilho ourinário.
Burmeilho cumo un pumiento curtido, passiando cul meio de las carreiras de carteiras de la sala, cun sue barica de burmelheiro na mano, l porsor iba ponendo perguntas subre la matéria dada, até que perguntou: " Darinho, cumo se chama l uorgano scretor de la ourina?"
Darinho ampeçou el tamien a quedar burmeilho porque nun se lhembraba de l nome resbelgado que habie de arrespunder, mas cumo l miedo que la bara le caira anriba las oureilhas inda era maior, arriscou ua respuosta: "ye la pixa, sr. porsor!".
Lhebou tanta barada ne ls uolhos, que passados quarenta anhos inda le dében star a doler.
Parabienes
Calros f


Quementar

Creative Commons License
This work is licensed under a Creative Commons Attribution-NonCommercial-ShareAlike 3.0 Unported License.

.Partecipar

. Partecipar neste blogue

.Ls Outores

.Antradas

. Cun Deboçon mas sin Perbe...

. Bacanças ne l Lhitoral

. Belas firmes, hasteadas i...

. La Rata Znuda

. 30 anhos ó mais

. McGregor

. Ancontro de bloguers

. Bien mos podemos anganhar...

. Passeio de bicicleta pu l...

. Que mundo ye este?!

.Arquibos

. Janeiro 2014

. Agosto 2013

. Outubro 2012

. Setembro 2012

. Junho 2012

. Maio 2012

. Abril 2012

. Março 2012

. Fevereiro 2012

. Janeiro 2012

. Dezembro 2011

. Novembro 2011

. Outubro 2011

. Setembro 2011

. Agosto 2011

. Julho 2011

. Junho 2011

. Maio 2011

. Abril 2011

. Março 2011

. Fevereiro 2011

. Janeiro 2011

.tags

. todas as tags

.Janeiro 2014

Dom
Seg
Ter
Qua
Qui
Sex
Sab

1
2
3
4

5
6
7
8
9
10
11

12
13
14
15
16
17
18

19
20
21
22
23
24
25

26
27
28
29
30
31


.Lhigaçones

.antolhados


Estadisticas gratis

Contador de visitas
blogs SAPO

.subscrever feeds