Ourrieta l Refustedo

Nien sei cumo me hei-de justeficar de tamanho stremunteio! Si, aposto que pensestes que me perdi pul mundo, un mundo adonde nun tebísse anternete. Nó! Anternete si habie an casa mas ousá-la nun podie...

Dais fé de bos haber dezido que me habie zborciado de l miu tiu porque cheiraba mal de ls pies!?

Nun ye que ua mulhier acaba por siempre fazer merda ne l respeita a cousas de l coraçon!

You que dezie que nun me querie ajuntar cun mais ningun ambaixo de las mesmas teilhas, cumo quien diç, roupa, mesa i cama lhabada!

El parecie tan buono, tan meigo, tan lhabadico de ls pies i de las partes...

Todo bien anquanto namoro: Biajabamos, passiabamos, lhebaba-me a jantar a la lhuç de belas, ( nun hai tie que rejista a un jantar romántico) fazie-me acender belas quando mos rebolcábamos, daba-me oufertas, lhimpaba-me la casa... anfin, porfeito de mais para ser berdadeiro!!!!

Ajuntemos ls benairos i, ende, las cousas fúrun-se cumplicando.

Dou an dezir que you daba nas bistas als outros tius, que se bien a babá-se quando me mirában pa las tetas, que me quemien las piernas cun ls uolhos i que a la cierta you serie aqueilha an que pensáben quando se benien cun las sues ties. Ua machice de pormeira... Un bui de cubriçon!!!

Fui aguantando l ciúme, porque na berdade, el cumpensába-me ne ls rebolcos, çfazie-se an cousas nuobas para me fazer chegar al cielo, tornar, i tornar... Dezie-me que se iba a deixar desses ciúmes malinos, balalá, balalá...

Nada! Cada beç pior! Chegou al punto de me pribir l uso de la anternete. Bós rides-bos i fazeis pouco de mi!? Mirai que si hai homes assi...

Dezie-me que nun querie que tubira cumbersas calientes nesses chats que por alhá hai, que a las bezes iba mui caliente quando zlhargaba la anternete i iba pa la cama, que al cierto starie a screbir i a ler poucas bergonhas...

Mas claro que nó, dezie-le. Era berdade. Nunca stube a cumbersa cun naide que you gusto de ber la cara de la giente cun quien falo i nun me meto an abinturas na anternete. El achaba que you staba a mintir...

Tirou-me l cumputador que tenie an casa i dixo-me: Ai de ti que me apareças cun outro!

Hai homes assi, i até bos digo mais, hai muito mais que puodades eimaginar. Nun gústan que las ties ánden a nabegar ne l cibermundo porque ye cousa que nun son capazes de cuntrolar.

Ora, cumo sabeis, l miu trabalho nun ye pera doce i alhá nien pensar arranjar tiempo para screbir séia l que fur que nun séia de l trabalho.

Ua mulhier nun se puode deixar pisar assi, ten que tener denidade.

Botei-lo fuora de casa i de la mie bida.

Stou lhibre daquel almaneche dun raio i para mais sigurança mudei la fechadura a la puorta.

Roupa mesa i cama lhabada!? Caralcho, nunca mais!!!!