Nun sei se yá bos dixe que nun m' anteresso pula política. Ye cousa que solo acumpanho de beç an quando, a la çtáncia. Mas cumo nun hai regra sin eicesson, por esso hoije bou falar-bos de un çcurso que oubi soutrodie, quando staba a cenar cu la Joana i cu ls rapazes.
Stábamos a quemer ua buona puosta a la mirandesa i la cumbersa staba a anteressar-me, porque l mais nuobo staba a falar de la nuoba porsora que chegou a la scuola i you, cumo bien sabeis, anteresso-me por saber quien son las porsoras de l miu filho i, siempre que tengo ouportunidade, gusto de las coincer.
Antretanto, houbo ua paraige na cumbersa i oubi alguien na telebison dezir que l Purmeiro Ministro habie citado Ls Lusíadas nua cerimónia de houmenaige a Adriano Moreira, pessona mui querida por ua amiga mie, que ye mirandesa mas stá a bibir an Fráncia. Oumentei lhougo l sonido de la telbison, porque querie saber se l Purmeiro Menistro se referie als Lusíadas an pertués ó an mirandés. I tamien staba curjidoso por saber se la citaçon yera de l canto nono, l' único que you li cumpletamiente i cun atençon.
Anfeliçmiente yá nun fui a tiempo de oubir la citaçon, mas solamiente la splicaçon. Inda staba cun miedo que Passos Coelho ampeçasse a debedir las çtáncias an ouraçones, mas esso nun acunteciu. An beç desso, oubi ua splicaçon clara de l sentido de ls bersos, cousa que nunca oubi als mius porsores de Pertués de la secundaira.
Para quien stá curjidoso, eiqui deixo las palabras de l nuosso Purmeiro: "E serão ventos mais favoráveis quanto mais firmes, quanto mais hasteadas, quanto mais resistentes forem as nossas velas".
Esto, mius amigos, ye un berdadeiro çcurso mobelizador, que cumbida l pobo a hastear las sues belas. You gusto muito de hastear la mie, porque sei que quando tengo la bela firme, hasteada i rejistente, nun hai aire que la puoda parar. Sinto até que, apesar de Passos nun citar la berson mirandesa de l Lusíadas, prestou ua pequeinha houmenaige a este blogue, que ten percurado hastear las belas de quien l besita.
I para cuntinar a cumprir esses desígnios, eiqui bos deixo mais ua eimaige que bos ajudará an tal nobre misson.
. Cun Deboçon mas sin Perbe...
. Belas firmes, hasteadas i...
. McGregor
. Bien mos podemos anganhar...
. Passeio de bicicleta pu l...