Quarta-feira, 25 de Janeiro de 2012

Personalidade de la semana - 2

 

Peç que yá bos stou a oubir: esta semana pouco custaba a scolher la personalidade de la semana, l nuosso eicelantíssemo Persidente ganhaba de caras i por muitos, que nun habie naide, nacido ó por nacer, que se le arrimasse ne l çparate de las baboseiras.

Pus anganhais-bos. Quedais a saber que este blogue nun ambarca an carneiradas nien bai cul ganado cumo todo mundo. Eiqui somos un blogue respeitador i cun balores republicanos, nun ye por menos de nada que bamos a poner un de ls símbelos de la República cumo un rodilho de lhimpar l chano, cumo muitos fáien por ende, i apuis eilhes ye que son respeitables i nós uns tunticos pouco requemandables i nun sabemos l que dezimos!... a Sue Eiceléncia bien le bóndan yá las túndias que le dórun por essa anternete afuora; más a más, you bien antendo l que l Senhor Persidente dixo, antendo i assino ambaixo, que nós, ls que fazemos pula bida i la ganhamos de maneira séria i a trabalhar, custa-mos que mos métan la mano al bolso pra mos sacar l denheirico que tanto mos custou a ganhar. Bós, que l hardestes ó bos ben de subcídios ó doutra matrángola qualquiera, claro que nun bos custa bé-lo a ir-se ambora, buono, nun amporta, la personalidade de la semana eiqui, acontra l mainstream (ah caralho, estas tiradas an strangeiro anféitan bien l scrito!), ye outra.

 

Eiqui la teneis:

 

 

Cunheceis-la? Nó, ora nó, sous eignorantes de l caralho! Anda que se fura ua putéfia qualquiera dessas qu'ándan a amostrar las bergonhas na talbison, debrebe la nomeábades...

Pus esta senhora chama-se Celeste Cardona i, nien sei cumo hei de dezir, fizo parte, ó melhor, fizo LA parte, nun de ls redadeiros gobernos que tubimos.

Bai a lhebar l prémio de personalidade de la semana bien merecido, que bien fizo por el, inda que bós, culs oulhicos cerrados cunsante andais, talbeç nun bos hábades dado de cunta de nada.

Anton nun ye que la tie - que diç que tamien bai a ser mandonça ne l negócio de la lhuç de ls chinezes, si, esse!, quando le procurórun porquei la habien scolhido, fui senhora de respunder, antre outras cousas, que, i bou a traduzir al pie de la letra para nun haber anganhos: "nun fui menistra (...) eizerci un cargo menisterial", torno a screbir: "nun fui menistra, eizerci un cargo menisterial...". Assi, tal qual, mesmo cumo se quien oube, ó lei, fussa cimprico i nun antandira.

Ah rapazes, anton cun ua tirada destas nun ye para ancostar lhougo ls outros candidatos i arrecadar i prémio de personalidade bien arrecadadinho?! Isto ye mesmo cumo se you, cumo tal, agora bos dezissa que nun sou nada zbocado, solo se me scápan uas berdades i uas scaralhadas de beç an quando. Ó anton daqueilha beç, a antrar pal stádio de la Lhuç, digo-le you al miu cumpanheiro: Sabes que l Mantorras nun bai a jogar, que cobrou ua pierna!... I respunde-me l gaijo todo lhampeiro: Ah, nun sabie, inda esta manhana dezien ne l radio que solo tenie ua fratura. Pus claro!

 

Buono, prémio antregue, cumpanhie çfeita. I para que pori nun quedeis ambaçados cula eimaige de, cumo ye que hei de dezir, respunsable gobernamantal, pongo-bos eiqui las eimaiges de dues berdadeiras Menistras, Mulhires i Menistras cun M grande, de un paiç cebelizado, quier dezir, noutros tiempos cebelizado, quando l sou xefe, esse grande líder, esse génio, esse eiluminado, esse guia de ls pobos, esse ungido, esse..., anté me fáltan las palabras i se me rásan ls uolhos d'auga de me lhambrar de la anjustícias que le fazírun... quando l Senhor Doutor Sílbio Berlusconi sabie scolher l "eilenco gobernamantal".

 

 

Ecco:

 

 

 

Mara Carfagna

 

 

 

 

i Michela Brambilla

 

 

 

 

estas si éran mulhieres para fazer bien la parte! Tenerei que cunfessar que nun sei de quei caralhos eilhas éran menistras i bós tenereis que cuncordar que isso tamien nun antressa la punta de un cuorno. Agora, que ténen todas las cundiçones para poder fazer un bun trabalho, seia de pies, seia deitadas, seia de frente, de cuostas, seia adonde seia, i torna a tornar, isso naide l puode negar.

Ah grande Sílbio, miu pai spritual!! Ampuntórun-te, a ti i a la tue magnífica eiquipa, bamos a ber agora cumo se zanráscan a sacar las patas de l'Ouropa de las bielhas adonde las deixórun cachapuçar. Se cun estes perfis nun íban alhá, anton caralho... refoder por refoder, al menos cun estas un refodie-se i cuntento, que inda alegraba la bista a la hora de l telejornal.

publicado por poucabergonha às 22:10
link do post | comentar | Adicionar als purferidos

.Partecipar

. Partecipar neste blogue

.Ls Outores

.Antradas

. Cun Deboçon mas sin Perbe...

. Bacanças ne l Lhitoral

. Belas firmes, hasteadas i...

. La Rata Znuda

. 30 anhos ó mais

. McGregor

. Ancontro de bloguers

. Bien mos podemos anganhar...

. Passeio de bicicleta pu l...

. Que mundo ye este?!

.Arquibos

. Janeiro 2014

. Agosto 2013

. Outubro 2012

. Setembro 2012

. Junho 2012

. Maio 2012

. Abril 2012

. Março 2012

. Fevereiro 2012

. Janeiro 2012

. Dezembro 2011

. Novembro 2011

. Outubro 2011

. Setembro 2011

. Agosto 2011

. Julho 2011

. Junho 2011

. Maio 2011

. Abril 2011

. Março 2011

. Fevereiro 2011

. Janeiro 2011

.tags

. todas as tags

.Janeiro 2014

Dom
Seg
Ter
Qua
Qui
Sex
Sab

1
2
3
4

5
6
7
8
9
10
11

12
13
14
15
16
17
18

19
20
21
22
23
24
25

26
27
28
29
30
31


.Lhigaçones

blogs SAPO

.subscrever feeds