L' eimage ten pouco que ber cu l testo, mas stá eiqui para apreciaçon de ls lheitores.
Ah lheitores, çculpai alhá star tanto tiempo sin screbir eiqui nada, mas stube de férias na Scócia i nun tube tiempo nanhun pa l' Ourrieta.
You nin querie fazer bacanças astanho i inda le dixe a Joana:
- Anchimos la çpensa de lhatas de atun i salsixas, cerramos las puortas i las jinelas i apuis percuramos uas fotografies de uns sítios ne l strangeiro, ponemos ne l Facebook i to la giente queda a pensar que fumos mesmo alhá.
Nada feito, nun se deixou cumbencer i oubrigou-me a percurar un pacote de férias atratibo i eiquenómico. L mais barato que ancuntrei fúrun uas férias nua aldé de la Scócia. Nun fui defícele cumbencer a Joana, yá que eilha querie un sítio sossegado, sin praias nin cunfusones. Deixemos ls rapazes cu ls abós i alhá fumos nós. Quedemos nun hotel cun un porjeto de turismo rural mui bien ourganizado i todos ls dies faziemos passeios mui anteressantes pulas aldés i bisitemos muito menumento i essas cousas todas.
Mas de quien you bos quiero falar ye de McGregor, un tiu que coincimos nun pub adonde fumos ua nuite apuis de cenarmos ne l hotel. Antremos i ancuntremos l pub sin clientes i l duonho atrás de l balcon, mui triste. Sentemos-mos al balcon, pedi dues cerbeijas i Joana quijo lhougo saber las rezones de la tristeza de l tiu.
- Quereis saber que tengo? Fui ansultado. Ansultado pu ls mius própios clientes! Chamórun-me un nome tan feio, que tube que ls meter todos fuora.
- Que nome?
El mirou-mos, mui sério, i dixo:
- You cunstruí este bar culas mies própias manos. Fiç la planta, l porjeto, las paredes, las puortas, las jinelas. You amei este bar mais que als mius pórpios filhos. I eilhes cháman-me McGregor, l cunstrutor de bares? Nó!
Mui alberotado, l home abriu la jinela i apuntou para ua picina.
- You cunstruí aqueilha picina culas mies pórpias manos. I eilhes cháman-me McGregor, l cunstrutor de picinas? Nó!
Inda mais nerboso, abriu l' outra jinela i apuntou para ua bedaçon.
- You cunstruí aqueilha bedaçon culas mies pórpias manos. I eilhes cháman-me McGregor, l cunstrutor de bedaçones? Nó!
Yá çfeito, mirou-mos outra beç, cu ls uolhos chenos de lhágrimas.
- Mas basta un home foder ua oubeilha...
. Cun Deboçon mas sin Perbe...
. Belas firmes, hasteadas i...
. McGregor
. Bien mos podemos anganhar...
. Passeio de bicicleta pu l...