Sábado, 19 de Março de 2011

Tubo que ser...

Yá ancomecei este testo bezes sien cuonta. Quando quei, agarro na fuolha i azimbro cun eilha pal lhume. Apuis torno i lhougo a seguir zisto.

A la ua, porque nun quiero que Poucabergonha pense que ando porqui a rundar, a la outra, porque nun se pense que me ando a meter na bida de ls outros.

Agora, sábado, l die que tengo mais tiempo, agora neste cachico antes de me scapar pa la nuite, para beilar, buer uns copos i buer l chuclate caliente  al nacer de l sol, acá me anchi de curaije.

Manhana lhebanto-me só a la hora de l almuorço i por isso tenerie que ser hoije.

Sáncia i Bernixe, que ye feito de bós que nunca mais destes seinhas de star bibas? Bós çculpai, mas ando mesmo cunsemida cun la buossa falta de nuobas.

Se percisardes d´algo, somos uas pa las outras. Carai, até yá feturei que algo bos habie passado de mal, un home tarado que bos maltratásse...

Sabe-se alhá, l que poderá assuceder a ua mulhier nun mundo destes!

 

Beisicos a dambas a dues,

 

Figénia

 

 

publicado por Figénia às 22:55
link do post | comentar | Adicionar als purferidos
6 comentairos:
De Çáncia de la Ancarnaçon a 20 de Março de 2011 às 00:37
Stimada amiga,

Quedo eimocionada cul cuidado que tenes cumigo. Stou bien de salude, mas cunfesso que l oumento de ls outores deste blogue nun me deixou muito antuziasmada, que nun me gusta muito la cumpanha. Bien sabes de quien falo, l que inda sonhou an star cun nós las dues. Sonhou, l probe.
Gustaba-me melhor mas ye ir cuntigo a buer un chuclate caliente al nacer de l sol... quien sabe se inda nun mos ancuntramos por alhá.
Beijicos cumpanheira


De Figénia a 20 de Março de 2011 às 00:58
Ui Çáncia, que cuntentica quedei cun las tues palabras! Beio que cuntinas ua pessona a botar cultura por todos quantos pelicos ten. Mira que até de Michelle Obama tu sabes cuontas.
A quien tu dizes de las cumpanhas que porqui róndan, mulhier... L que bal ye que nun stamos solicas, senó... digo-te you que mos iba a dar cangoixa!...
Quanto al chuclate caliente na Ribeira ye só treminarmos que la cousa arranja-se i puodes acarditar que antes de chegarmos a la Ribeira yá rumpimos meias suolas, i gáçpias i todo...

Beisicos,

Fi


De poucabergonha a 20 de Março de 2011 às 01:34
Buonas nuites, mies lindas!

Falta-bos Bernixe, ora si? Eilha nun aparece, you tamien yá quantá que nun daba notícias, 2 i 2... you nun ye por tal, que nun me gusta andar a ambenenar, más a más, esta tardica eilha fizo-me jurar que nun le dezie nada a naide, mas you, sendo a bós, aporcataba-me... nun ye que nun chegue para todas, mas you sei alhá, puode nun bos gustar ir apuis ne l caldo...

De qualquiera maneira, you julgo que bos debo un pedido de çculpas. Fui un bertoldo, antrei a matar i nun me dei de cuonta de la strema çancebelidade i culidade superior de seres houmanos que tenie delantre de mi.
L melhor bai a ser squecer todo, fazemos un "cuntrol+alt+delete" i ampeçamos outra beç.
You aperpongo ua cena, nun sítio acunchegado, adonde puodamos cumbersar cebelizadamente subre la arte, la cultura i subre esta nuossa querida lhéngua mirandesa. Quei me dezis?
Beijico de amigo


Agora solo para la mocidade:
Aprander que you nun duro siempre, rapazes: isto a falar assi cun estas lhambisgoias, l melhor que hai a fazer ye dá-le siempre rezon. Siempre. Si, mesmo que nun la téngan, l que ye tamien siempre. Home, anteimar para quei?... yá algua beç fustes capazes de meter algua mula al suco, stando eilha cun la zízara. Anton, liçon nº 1: dá-le siempre rezon; nº 2: agabá-las (i agabá-le merdas que nun antressan un caralho - la çancebelidade, la classe cun que se bísten, la çançualidade que eizálan quando ándan, l mistério que ténen ne l oulhar (esta nunca falha, inda nun antandi bien que caralho de graça le ancontran a tener mistério ne l oulhar)...buono, merdices assi. Quando tubíren l culo bien cheno de frajones, anté se derréren... cun un cachico de paleio, tate, cáien cumo ginjas. Deixa que ua destas dues aceite l cumbite para la cena, i apuis bereis quien le achega l frajones arriba.


De Figénia a 20 de Março de 2011 às 02:28
Poucabergonha:

Quedei cuntenta por saber que stás mais ceblizado cun las ties.
Nun se te çqueça de l que me aperponiste, porque hei-de star cun Çáncia para treminarmos i se eilha nun fur contra, anton cenaremos ls trés para fazermos las pazes. Inda bien que tu nun sós tan malo caçador cumo an pormeiro parecies que parecie que spantabas las raposas, ls lhobos, las perdizes i ls perros.
Spero notícias de Cáncia.

Á Çáncia, pansando melhor, para quei outro modo para te percurar senó este? Queda-te anton eiqui la pregunta: Bamos a ciar cun l mufoso? Las dues siempre mos defandemos de l lhobo que se stará porende, a armar an cordeiro.
Que te parece? Bá, tu sós mais culta que you i scálha tamien mais spabilada.

Un beisico para ti,

Fi


De Çáncia de la Ancarnaçon a 20 de Março de 2011 às 23:38
Biba, Figénia amiga:
Faziste bien aceitar l cumbite de l farromas para la cena. Bás a ber que barrigada de risa agarramos. Antes que nada fazemos-le arrotar cun ls 200 ó 300 ouros de la cena. Si! Anton, se cumbida nun deixa de querer botar figura i nun se ha de ancolher. Apuis, l más cierto ye el meté-los na brilha, que estes cun muita gola, quando chega l'altura de mostrar serbiço, pónen-se amarielhos cumo peidos i anté se aguemítan todos, mas cumo se aguante, nós bamos-lo calcendo, damos-le ua animadela, fazemos-lo sonhar cun jardines a scorrer miel i outras delícias, i apuis, quando stubir cachundico perdido, mandamos-lo a tener ua cumbersa cun Dona Palma. Si, la armana de la canhota. Bás a ber cumo nistante daprende adonde fui a çtrocar la peseta!
Ui, amiga, que anté yá tengo cuçquinhas na barriga so de maginar la cara de l mofoso quendo bir l que le tocou.
beijicos amiga


De Figénia a 21 de Março de 2011 às 11:57
Amiga Çáncia,

Ye siempre cun agrado ler las tus palabras, siempre a remar pa l nuosso lhado. Se nun mos defendemos nós quien ye que mos defenderá?
Sendo assi´, speramos que l marmanjo mos diga algo. Nós acá speramos l buono manjar i que nun pense el an mos mandar serbir ua çurrapa para mos amburrachar i mos lhebar a la falsa fé para un Motel de dubidosa catagorie. Ten que ser de Chamopanhe D. Perignon parriba i cun téntio, Çáncia.
Homes cumo el ye, son capazes de todo para tener buonos marmelos.

Muito beisico,

Fi


Quementar

.Partecipar

. Partecipar neste blogue

.Ls Outores

.Antradas

. Cun Deboçon mas sin Perbe...

. Bacanças ne l Lhitoral

. Belas firmes, hasteadas i...

. La Rata Znuda

. 30 anhos ó mais

. McGregor

. Ancontro de bloguers

. Bien mos podemos anganhar...

. Passeio de bicicleta pu l...

. Que mundo ye este?!

.Arquibos

. Janeiro 2014

. Agosto 2013

. Outubro 2012

. Setembro 2012

. Junho 2012

. Maio 2012

. Abril 2012

. Março 2012

. Fevereiro 2012

. Janeiro 2012

. Dezembro 2011

. Novembro 2011

. Outubro 2011

. Setembro 2011

. Agosto 2011

. Julho 2011

. Junho 2011

. Maio 2011

. Abril 2011

. Março 2011

. Fevereiro 2011

. Janeiro 2011

.tags

. todas as tags

.Janeiro 2014

Dom
Seg
Ter
Qua
Qui
Sex
Sab

1
2
3
4

5
6
7
8
9
10
11

12
13
14
15
16
17
18

19
20
21
22
23
24
25

26
27
28
29
30
31


.Lhigaçones

blogs SAPO

.subscrever feeds