You chamo-me Çáncia i sou mirandesa. Jesé cumbidou-me para screbir eiqui i diç que podie screbir subre l que quejisse i cume quejisse i, sendo assi, you aceitei. Nó que tenga algo de amportante a dezir-le al mundo, mas cume Jesé ye miu amigo hai tanto tiempo i l cumbite fui cun tan buonos modos…
Ampeço cun ua passaige de miu sobrino, i you solo l sei porque de beç an quando sou you, cumo tie, que l ajudo a fazer ls trabalhos de casa.
La porsora mandou fazer ua redaçon subre sexo ou algo relacionado cun esse tema. A soutordie cad’un liu la sue redaçon: Joana falaba de cuntracetibos, Zé de masturbaçon, Rita falou de rituales sexuais antigos, Rui de homosexualidade...
Chegou la beç de Norberto, miu sobrino, I l garoto ampeçou cun boç firme.
“Era ua beç, ne l bielho oueste, hai muito, muito anho. L reloijo de l’eigreija daba las siete de la tardica. Nubres de polareda arrastrában-se pula cidade mei’zerta. L sol inda rechinaba ne l hourizonte i tenhie las nubres de sangre.
De rumpon, al loinge, assomou la figura de un home a cabalho. Debagar, fui-se arrumando a caras a la cidade. Al chegar al ampeço de la rue prancipal, abeixou-se de l cabalho. L siléncio era pesado i sentiu-se l telincar de las sporas.
L cabaleiro chamaba-se MacCoy. Estaba todo bestido de negro, tirando-se un lhenço burmeilho anroscado nas golas i la fibela de prata cun que asseguraba las dues pistolas als quadriles.
L cabalho, camarada de muita andança, zbiou-se dalgeiro, a caras a ua poça d’auga.
TAU! TAU! TAU!
L cheiro a pólbera salie de la pistola que yá habie tornado para la cintura de McCoy. El nun gustaba de cabalhos spúrios.
MacCoy fui a caras a la taberna. Un probe de pedir que staba a la puorta acrucado a drumir, spertou i topou-le na pierna a MacCoy, cun l chapeu stantido a pedir ua smola.
TAU! TAU! TAU!
MacCoy nun gustaba que le topássen. Antrou na taberna.
Arrumou-se al balcon i pediu ua cerbeija. L ampregado dou-la. MacCoy porbou.
TAU! TAU! TAU!
MacCoy nun gustaba de cerbeija morna. Las pessonas mirórun spantadas para MacCoy.
TAU! TAU! TAU!
MacCoy nun gustaba de juntouros nien que armássen sinagogas.
Saliu de la taberna i zbiou-se pa l outro lhado de la cidade para cumprar un cabalho. Passou un tagalhico de garotos a correr a la borda del.
TAU! TAU! TAU!
MacCoy nun gustaba de puolo i inda para mais ls garotos íban a boziar i a MacCoy nun le gustaba l barulho.
Cumprou l cabalho i quando pagou l duonho anganhou-se a zbirá-le l troco.
TAU! TAU! TAU!
MacCoy nun gustaba que se anganhássen nas cuntas. Saliu de la cidade
Cun l sol yá quaije a çponé-se, la figura de MacCoy recortou-se acontra l hourizonte. L siléncio era pesado. FIM”
Norberto calhou-se.
La porsora i l restro de ls garotos stában barados.
La porsora, anraibada, pregunta-le:
- Si, mui bien, mas quei ten la tue redaçon que ber cun sexo?
Cun las manos ne ls bolsos, a mirar pa l chano adonde zenhaba uns garabatos cun la punta de l çapato, Norberto çpara-le:
- Anton?! L MacCoy era fodido.
Çáncia de l'Ancarnaçon
. MacCoy