Quando ua pessona se pon a screbir nun blogue, seia an que lhéngua fur, assujeita-se a ler uns comentairos. Esses comentairos puoden-mos ser agradables, zagradables, puoden nin mos calcer nin mos arrefecir i até mos puoden deixar antrigados. Ye l causo deste cachico que passo a transcrebir:
"Bós sois fodido! Yé solo para fazer crecer augadielha. Yá daprandistes cun las Telebisones i las Telenobelas."
Carai, porque será que este home me diç que daprendi cun las telebisones i cun las telenobelas? You nin beio telenobelas. Cunfesso que ando hai meses antrigado cun esto i até decedi ber uas telenobelas para ber se antendie que ténen eilhas a ber cul que se passou ne l Natal. Preguntei-le als mius rapazes se seguían algues i acunselhórun-me ls Morangos cun Açúcar. Pus-me a ber aqueilho, mas fartei-me lhougo, yeran solo moços boubos i you, para aturar moços boubos, yá me bóndan ls dous que tengo an casa.
Acunselhei-me cun Joana, mas eilha tamien nun conhece ningua. Telefonei-le a Pouca Bergonha i el respundiu-me que nun bai an "paneleirices de nobelas". Fui anton a casa de Çáncia, que me dixo que deixou de las ber ne l seclo passado i dou-me ua lista de nomes para you percurar na anternete.
Na berdade, nun ancuntrei nada que me fazisse lhembrar l miu último Natal, mas ancuntrei ua que me fizo lhembrar la mie mocidade. I tamien quedei a antender porque ye que l fiel leitor deste blogue antende tanto de telenobelas!